४ असार २०७८, शुक्रबार
गृह झन् मजबुत बन्दै विपक्षी गठबन्धन
झन् मजबुत बन्दै विपक्षी गठबन्धन

प्रमुख प्रतिपक्षी नेपाली कांग्रेस लगायतका दल वैशाख २७ गतेका लागि आह्वान संसद् विशेष अधिवेशनमा कसरी अघि बढ्ने भन्नेबारे तीव्र संवादमा उत्रिएका छन्।

कांग्रेसले पदाधिकारी बैठकमार्फतै प्रधानमन्त्री केपी ओलीलाई विश्वासको मत नदिने प्रस्ट पारिसकेको छ।


माओवादी केन्द्रले सरकारलाई दिएको समर्थन फिर्तासँगै अब फेरि मत नदिने बताएको छ। यी २ दल अन्य विपक्षीलाई समेत आफ्ना कित्तामा ल्याउने प्रयासमा छन्।

कांग्रेसले अविश्वासको मतका लागि माओवादी केन्द्र, जनता समाजवादी पार्टी र एमाले माधव नेपाल समूहसँग आन्तरिक छलफल जारी राखेको छ। कांग्रेस सहमहामन्त्री डा. प्रकाशशरण महतका अनुसार अब कसरी अघि बढ्ने भन्ने विषयमा विपक्षी दलबीचमा संवाद जारी छ।

विपक्षमा रहेका अन्य दललाई समेत प्रधानमन्त्री ओलीलाई मत नदिन आग्रह गरिने उनले जानकारी दिए।

गत मंगलवारबाटै विपक्षी दलका नेता कांग्रेस सभापति शेरबहादुर देउवा, माओवादी केन्द्र अध्यक्ष पुष्पकमल दाहाल ‘प्रचण्ड’ र जसपा अध्यक्ष उपेन्द्र यादवबीच छलफल जारी छ।

बिहीवार साँझ एमाले नेता नेपालले समेत बूढानीलकण्ठस्थित निवास पुगेर देउवालाई भेटेका छन्। भोलिपल्ट शुक्रवार साँझै माओवादी अध्यक्ष प्रचण्ड बूढानीलकण्ठ पुगेका थिए।

ललितपुरमा बुधवार विपक्षी दलबीच छलफल नै चलिसकेको छ। छलफलबाट विपक्षी दलले राष्ट्रियसभा उपनिर्वाचनमा गठबन्धन बनाएर अघि बढ्ने निर्णय भएको थियो।

प्रधानमन्त्री ओलीले गत बुधवार कांग्रेससँग विश्वासको मत माग्दै सहकार्य प्रस्ताव गरेका थिए। उनले एमाले नेतासहित कांग्रेस सभापति देउवाको बूढानीलकण्ठस्थित निवासमै पुगेर विश्वासको मत मागेका हुन्।

तर कांग्रेसले विश्वास गर्ने वातावरण नभएको भन्दै मत दिन नसकिने जवाफ दिइसकेको छ। सत्ताधारी दलको क्रियाकलाप ठीक नभएको र सरकार पटक–पटक गलत बाटोमा हिँडेको भन्दै कांग्रेसले सरकारलाई सचेत समेत गराएको छ।

कांग्रेसले कोरोना संक्रमण व्यापक रूपमा बढ्दा समेत सही ढंगबाट काम नगरेको भन्दै सरकारको आलोचना समेत गर्दै आएको छ। बजेट अधिवेशन बोलाउन ढिला भएको र कोभिडलगायत महत्त्वपूर्ण विषयमा छलफल गर्नुपर्ने बेला विश्वासको मत लिनकै लागि अधिवेशन बोलाइएको भन्दै सरकारप्रति कांग्रेस रुष्ट छ।

उता, जसपा नेता डा. बाबुराम भट्टराई र यादव समेत सरकारसँग रुष्ट छन्। उनीहरूले नेतृत्व गरेको जसपाको ठूलो शक्ति एकातिर हुँदा महन्थ ठाकुर सहितका केही नेता कसरी अघि बढ्ने भन्नेमा प्रस्ट खुल्न सकेका छैनन्।

यद्यपि नेता राजेन्द्र महतोले भने प्रधानमन्त्री ओलीको कित्तामा उभिन नसक्ने संकेत गरिरहेका छन्। राजधानी दैनिक

Facebook Comments

हरेक खबर खास खबर